KELAB NGEPAN BETONG [KNB]

Penerang Pasal Kereban Iban sida ke lelaki

Lanjang

Ngepan tradisional laki ke dikena ba pala dikumbai kitai lanjang. Bisi sebengkah perengka ba lanjang ke dikumbai ketapu. Ketapu nya digaga ari wi. Wi nya dianyam lalu chura iya nitihka peneka diri empu. Udah wi tembu dianyam sereta dicat, iya digelar kitai ketapu. Bisi mega ketapu dianyam sereta dicat nitihka chura burung kenyalang.

Udah ketapu tembu dianyam sereta dicat, dia mih orang ke landik ngaga perengka tu ngujakka bulu burung ba ketapu nya. Bulu burung ke suah agi diambi orang diujakka ba ketapu iya nya bulu burung ruai sereta bulu burung kenyalang. Pengelebat bulu burung ti diujak ba ketapu nya nitihka siku-siku orang ti ngaga iya. Makin lebat bulu nya diujakka , makin manah iya dipeda.

Udah ketapu nya diujakka bulu burung ruai enggau bulu burung kenyalang, iya tau digelar kitai lanjang. Enti kitai meratika siti-siti bansa ngepan laki, enti lelaki nya ngena baju burung, lanjang iya enda tentu lebat bulu burung . Tang mih enti ngena gagong, lanjang sida diujak enggau bulu burung ti lebat. Engka nya nitihka pemisi kereban tradisonal sida. Enti kereban nya ditinggalka orang tuai sida, nya aja meh pemisi sida laban perengka tu pedis amat ka ngiga diatu.

Bisi orang nusi, bisi penti enti ka ngaga lanjang. Sekeda orang nusi, nadai kala bisi penti enti deka ngaga lanjang. Semua utai tu engka nitihka penau diri empu. Lanjang tu mega ukai sengapa main. Enti lanjang tu sigi digaga kena berami sereta bisi pengawa, lanjang tu ulih kena bebuti lalu bemain. Ngambika bisi endur nyema, maya kitai betaritka orang ngajat ngelinggi ranyai, kitai ngena lanjang ti tau uti. Tang mih enti lanjang dikena orang ngayau, kitai enda tau bebuti tauka kena begagai.

Gagong

Gagong sebengkah baju ti digaga ari kulit jelu siga dikena aki kitai kelia. Gagong tu suah dikena kitai bansa Iban kelia maya nurun ngayau mulau menua, ngulu pengerami besai sereta pengawa begawai. Gagong enda tau dikena ninting hari tauka dikena orang sengapa laban kelia suba Gagong tu dikena orang ke deka nurun ngayau, orang ti kering, berani sereta tampak nama. Nitihka cherita tuai, bala munsuh takut deka ngelaban enti meda bala Iban bekenaka Gagong.

Gagong suah agi digaga ari bulu tauka kulit jelu siga baka jelu jugam ke tusah diulih laban jelu tu kering sereta mangah. Kelia menya, sida ke ngembuan Gagong tu dikumbai orang berani sereta bisi pengaruh. Kelimpah ari nya, ngepan tu disempulang enggau taring jani ke berantu, ngembuan pengaruh bebunuh sereta dinding bulu.

Mayuh orang enda nemu bida gagong enggau baju burung. Baju burung tu mega siti ari perengka baju tradisional sida ke laki. Baju burung tu suah agi dikena maya ngintu pengerami ti biasa aja. Baju burung mega dikena nyambut temuai datai tauka maya ngajat. Enti gagong tu tadi kena orang ngayau sereta begawai sepengudah iya bulih dengah. Tang baju burung ti bisi ukir antu pala nya meh baju burung ti dikena bala laki ngayau.

Baju burung selalu iya bechura mirah terang. Baju burung ditenun ngena chara sungkit sereta asil iya alus agi. Motif baju burung lebih kurang baka motif pua kumbu. Tang selalu agi ngena motif mensia. Ubung chura emas dikena sida nyungkit kain dikena ngaga baju burung. Baju burung digaga sigi engkeman enggau tubuh orang ke ngempu baju.

Sirat

Sirat kereban ngepan sida ke laki dikena ba punggung lalu nutup ke baruh pah. Kelia menya, orang laki sigi nadai betanchut tang semina besirat aja. Sirat tu ukai semina dikena nurun ngayau, ngereja pengawa ritual tauka maya begawai. Tang mih maya besehari sehari sida ke laki pan ngena sirat. Selalu iya, pemesai sirat tu 50cm buka kali enggau 500cm pemanjai (50cmX500cm). Iban kelia udu ngiga asil babas dikena ngaga baju, kain sereta sirat. Ngambika chunto, kulit temeran ari kayu tekalung ti ditenchang dataika iya alus besabut dikena ngaga sirat tauka baju tekalung.

Kain ti nyadika sirat sida ke laki baka kain pua kumbu. Bisi mega sida ke laki ngena kain buri. Enti nyema sida ngena kain pua kumbu nyadika sirat. Pua kumbu nya patut bechura mirah. Bungai tauka motif pua kumbu nya tadi bechura burak. Pua kumbu ti ditenun endang enda tau sengapa. Chura sirat mega enda sengapa digaga orang. Enti jeman suba, sirat mirah tauka sirat coklat sigi dikena orang begawai sereta ngayau.

Bisi mega orang ngaga sirat ngena kain chelum, udahnya diujung kain nya mua ke kiba enggau kanan dilagu orang ngena manik, kerubung tekuyung mit sereta loceng. Chura chelum suah agi dikena sida ke laki maya bisi penusah baka pemati. Taja sida bujang berani, sida enda tau ngena sirat mirah tauka coklat lebuh ngintu penusahnya.

Sida ti nenun pua kumbu sigi besampi tauka miring dulu sebedau nenun. Perengka ti dikena ngaga pua kumbu iya nya pemalu taya kena malu kapas, taya digaga nyadika ubung sereta akar engkudu, buah tajau tauka akar sebangki diproses nyadika chuk. Udah pua kumbu tembu ditenun, iya tau dijadika sirat sida laki.

Pemanjai sirat sida ke laki jauh ngeluie ari patung tang enda datai di kaki. Sirat tu dikena ba punggung dibelit ke baruh kangkang ari pah sida ke laki. Sirat tu selalu iya dibentuk orang segi tiga. Ujung kain dijuntaika orang ba belakang sereta ba mua punggung. Ujung kain ti dilagu orang ngena manik, kerubung tekuyung sereta loceng tadi dibantaika maya sida laki diperaduka ngena sirat.

Marik

Perengka ngepan tradisional laki Iban mega bisi nyengkaum marik. Enti tunga ke Batang Rajang pelilih menua Sibu, marik dikena sida ke laki iya nya marik ubu. Marik tu ditusuk ngena manik aja. Bisi bungai iya empu kena ngelagu marik ubu nya.

Marik jarang dikena sida ke laki maya bekenaka ngepan tradisional. Kebuah sida enda ngena marik laban orang ti ngena marik nya semina tuai serang maya ngayau. Marik nya mega enda dikena sengapa orang. Semina siku aja tau ngena marik, iya nya tuai serang ngayau.

Nambahka nya mega, marik ukai semina kena siku tuai serang ngayau aja. Marik mega semina dikena siku orang aja lebuh ngintu gawai tauka pengawa. Pengawa nya baka Gawai Kelingkang, Gawai Kenyalang, Sandau Hari, Betanju sereta niti ranyai. Pia mega siku orang sigi ngena marik lebuh ngintu Gawai Antu Pala. Marik tu nyadika tanda sida nya orang ti berani, beberita sereta bisi nama.

Bisi mega orang ngambi taring nyadika tating marik. Taring tu selalu iya diambi ari jelu ti siga, mangah sereta kering. Ngeli mensia ke udah dikayau mega ulih nyadika tating marik sida laki Iban. Kelia, tating marik nyengkaum manik ti digaga bala manang ti digelar kitai Ilau Kerangan. Taring babi ke suah agi didinga kitai nyadika tating marik tauka diengkah ba lengan. Taring babi tu siti ari bansa rajut tauka pengaruh ti diulih sida ke laki maya niat tauka nuntut. Sekeda laki ti bidik ngulihka pengaruh tu ari mimpi tauka diberi Antu Yang. Antu Yang tu antu ti nyaga siku-siku orang ke ngembuan penemu ti bisa.

Terabai

Perengka Iban ke asal agi ulih dipeda kitai diatu iya nya terabai. Terabai tu siti ari perengka perang kitai Iban. Terabai tu suah agi dikena sida bujang kering berani ngayau, bebunuh, kayau anak sereta ngetanka menua ari munsuh. Tang terabai mega ulih dikena maya ngajat Bujang Berani sereta ngajat Bebunuh. Terabai ke digaga sigi besai, ulih disebaka enggau pemesai sereta baruh mimit ari mensia.

Terabai tu digaga ari kayu ti pemadu kering sereta tan. Kayu ke dikena orang ngaga terabai tu iya nya kayu tebelian, entenong, bandir tapang, kerangan batu, kayu mengering sereta empuas. Orang ke tau ngaga terabai tu ukai orang sengapa. Sida ti bisi pemendar ari Petara alai ngaga terabai tu iya nya bujang berani ti kala bedengah tauka bulih pala musnuh.

Patrick Serai ti udah pencen sedadu, 68 tahun nusi cherita munyi tu “Terabai mega enda tau diukir sengapa nitihka peneka ati. Orang ti ngaga ukir ba terabai suah agi milih bansa ukir nitihka bulu sida ti ngena nya. Ngambika chunto, terabai bujang berani udah bulih mayuh pala sigi tentu ngena terabai ke ngembuan ukir ti kering mega”. Bungai ukir ti suah dikena ngukir terabai iya nya Tungaka Matahari Padam sereta Ngerejang Kalimantan Indonesia. Bisi mega orang ngukir bungai terabai tu dichuan ari mimpi, chura mua jelu sereta antu.

Terabai diukir ngena lungga, batu sereta getah kayu. Chura terabai digaga ari getai pelai tauka chuk ai kayu. Udah nya dijembi ngambika chuk nya jampat rangkai. Terabai tu ukai utai sengapa lalu iya bisi penti maya sida ngaga sereta ngukir bungai iya. Penti ngaga terabai tu iya nya enda tau mayuh jaku, enda tau ditanya tauka dipadahka penama bungai ukir terabai sereta enda tau diperaka. Kebuah pia enggai ke orang ke ngaga, orang ke ngukir sereta orang ke meraka nya alah bulu tauka enda gayu. Pia mega enti nyema bini sida ti ngaga terabai tu ribat, sida enda tau ngukir terabai tu.

Senyata

Perengka ngepan laki Iban enda genap enti sida nadai bepegaika senyata. Senyata tu mih nyadika tenggau maya sida nurun belelang, begigaka jelu sereta ngayau. Laki Iban sigi dibekalka apai indai sida iya enggau senyata ti nyema sida udah angkat bujang. Tu mih utai dikena ngelatih sida awakka nyadi bujang berani, ulih ngetan ke menua sereta tampak berita. Senyata tu mayuh macham bengkah. Semua senyata tu sigi digaga ari jari sida ti landik.

Sebengkah ari senyata ti sigi bisi dikembuan siku-siku laki Iban iya nya Ilang sereta nyabor. Ilang sereta nyabor deka sebaka semina nyabor tu pandak agi ari ilang tang mata nyabor besai agi. Nyabor tu sigi dikembuan sida ke laki kelebih agi sida ti orang kayau. Ba ulu nyabor selalu bisi diengkahka sida bulu buk. Bulu buk tu nandaka nyabor nya kala dikena ngayau sereta udah bisi dengah. Bulu buk nya mega tanda sida laki ti ngempu nya tampak berita sereta tampak kayau. Bulu buk ti diengkah orang ba ulu nyabor dikumbai kitai jambur tauka jabang nyabor.

Pemegai nyabor nya bisi ukir. Ukir nya ukai ukir ti digaga sengapa. Patrick Serai becherita munyi tu,“Ukir pemegai nyabor ke dipeda kitai baka ke seharitu nitihka abi dengah orang ke ngena nyabor nya. Kitai Iban selalu agi ngena nyabor maya ngayau laban mata nyabor tu besai”. Nyabor ke kala dikena ngayau sigi digenselan orang belama baka bebunuhka babi sereta diberi piring. Nitihka cherita, duku kayau ke kala bedengah ulih kena ngubat anak mit sakit gatal sereta anak mit ti tengik udu nyabak. Ilang sereta nyabor ti udah kena ngayau enda tau disintak maya bini sida ribat.

Tumpa

Orang laki Iban kelia mega enda lari ari ngena perengka ngepan sebaka enggau orang indu. Laki mega bisi ngena tumpa. Sekeda menua ngelar tumpa tu simpai tauka rembat. Tumpa tu digaga ari pirak. Tumpa dikena sida laki enda mayuh. Siti tumpa dikena ba sepiak kiba sereta kanan jari enggau betis.

Orang laki jarang bekena ke tumpa. Bisi mega ba lengan sida ditanchang enggau ubung bechura mirah lalu bisi taring babi. Utai nya meh ke suah agi dikena sida enti dibandingka enggau tumpa. Kebuah pia laban taring babi tu kelebih agi taring babi ke engkelung nya pengaruh ti bisa sereta kebal.

Enti deka ngajat sereta bepekit, orang laki Iban sigi deka bekena ke tumpa. Tang mih enti ka nurun ngayau, sida sigi enda ngena tumpa. Tumpa tu nyadika perengka ias sida iya aja. Tumpa tu nadai mayuh guna iya. Sida laki lebih agi ka bekalingai tauka bepantak.